L'entschatta da matg ha lieu per l'emprima giada l'Emna da la furmaziun professiunala. Ella vegn purtada da 22 chantuns ed accumpagnada da medias localas – en spezial staziuns da radio. In'intervista cun Peter Marbet, vicesecretari general da la Conferenza svizra da las directuras e dals directurs chantunals da l'educaziun publica (CDEP).

Rolf Marti

Peter Marbet, dals 8 fin ils 12 da matg ha lieu l'Emna da la furmaziun professiunala. Per tge vai?
L'Emna da la furmaziun professiunala avain nus sviluppà a basa dal di tradiziunal da la furmaziun professiunala, enconuschent era sut il num «Di da radio». Nus intermediain a geniturs e giuvenils ch'èn en la vegliadetgna da tscherner ina professiun invistas en la furmaziun professiunala e mussain las perspectivas multifaras ch'in emprendissadi porscha. A l'acziun sa participeschan 22 chantuns e 30 staziuns da radio ed ulteriuras medias. Pia: l'Emna da la furmaziun professiunala è ina campagna d'image per rinforzar la furmaziun professiunala.

Tge distingua ella dad autras campagnas naziunalas per la furmaziun professiunala?
Ella è la suletta campagna che vegn dirigida dals chantuns. La preschientscha è bain identica en l'entira Svizra, ma la rapportaziun accentuescha ils aspects locals sco las differenzas da la structura economica. En pli metta ella en il center aposta protagonistas e protagonists da la furmaziun professiunala – emprendistas ed emprendists, persunas responsablas per la furmaziun, maistras e maisters sco era represchentantas e represchentants da las autoritads. Quest connex local procura per ina proximitad speziala cun las gruppas en mira.

Pertge vegn l'acziun extendida sin in'emna?
Nus survegnin ina publicitad pli gronda e cuntanschain pli bleras gruppas en mira. Bleras da las 30 staziuns da radio appartegnan a chasas da medias grondas. Quellas lavuran oz a moda crossmediala. Quai signifitga: in tema vegn elavurà savens per plirs chanals – radio, televisiun, products stampads, plattafurmas online. Quest potenzial vulain nus trair a niz. Plinavant pon las contribuziuns vegnir emessas pliras giadas durant l'emna. Cun l'Emna da la furmaziun professiunala avrin nus in'umbrella mediala. Sut quella han ils singuls acturs sco ils manaschis d'emprendissadi, las federaziuns professiunalas u las scolas professiunalas spezialisadas la pussaivladad da realisar en l'avegnir atgnas acziuns sco per exempel dis da las portas avertas.

La campagna dura da nov pli ditg. Datti anc autras adattaziuns concepziunalas?
Gea. Nus intensivain il partenadi cun ils SwissSkills. Da nov avain nus er in partenadi cun la plattafurma per la tscherna da la professiun «Lehrberufe Live!» e cun cussegliaziun.ch. Il partenadi cun berufsbildungplus.ch – la campagna tetgala naziunala – vegn cuntinuà.

Co funcziunescha la plattafurma «Lehrberufe Live!»?
«Lehrberufe Live!» emetta quatter giadas l'onn var 15 streams directamain en l'instrucziun da la tscherna da la professiun da las scolas popularas. Emprendistas ed emprendists en ils manaschis raquintan davart lur professiun e co ch'ellas ed els vesan lur mintgadi da lavur. Ils streams vegnan transmess d'in telefonin a l'auter, il format lavura cun peer-to-peer ed è pia sco fatg sin mesira per la generaziun Z. En il rom da l'Emna da la furmaziun professiunala vegn ad avair lieu in tal di da streaming.

Tge plivalur portan quests partenadis?
Il Di da radio aveva mess in ferm focus sin ils geniturs sco gruppa en mira. Grazia a «Lehrberufe Live!» cuntanschain nus pli e pli era giuvenils che s'occupan cun la tscherna da la professiun, persunas d'instrucziun e manaschis d'emprendissadi. Ultra da quai survegnin nus material da video che nus pudain offrir als chantuns ed a las medias per lur chanals socials. SwissSkills intermediescha a las medias maistras e maisters per reportaschas ed intervistas ch'èn da chasa en la regiun dal medium correspundent. Tut en tut pudain nus generar era dapli attenziun cun il sustegn dals partenadis. La fin finala han tuts la medema finamira: rinforzar la furmaziun professiunala.

Sent'ins gia il 2023 tut las midadas dal concept?
La realisaziun succeda tenor las pussaivladads dals singuls chantuns e partenaris medials. Nus sperain da pudair realisar gia il 2023 ina gronda part da las novaziuns. «Lehrberufe Live!» vegn ad esser disponibel l'emprim onn mo en Svizra tudestga. I fiss bel, sche quels quatter chantuns che n'èn fin uss anc betg da la partida sa participassan il 2024.

Tge messadis e cuntegns vegnan intermediads cun l'Emna da la furmaziun professiunala 2023?
Quai che pertutga il cuntegn vai primarmain per il process da tscherner ina professiun e per il marketing da plazzas d'emprendissadi, en in senn surordinà per mussar las fermezzas da la furmaziun professiunala. Nus ans legrain sin bleras reportaschas ed intervistas interessantas e sguards captivants davos las culissas.