Dals 8 fin ils 12 da matg 2023 ha gì lieu per l'emprima giada l'Emna da la furmaziun professiunala – l'eveniment successur dal Di interchantunal da la furmaziun professiunala. 30 staziuns da radio localas, pliras medias online sco era staziuns da televisiun localas han rapportà davart la furmaziun professiunala. Il nov concept ha augmentà fermamain la preschientscha mediala.

L'Emna da la furmaziun professiunala è in'acziun da la Conferenza svizra dals uffizis per la furmaziun professiunala (CSFP). La finamira da l'occurrenza, a la quala participeschan 22 chantuns, è d'infurmar ils giuvenils e creschids davart las fermezzas e las pussaivladads multifaras da la furmaziun professiunala. Il 2023 è l'eveniment vegnì concepì da nov. A basa dal di tradiziunal da la furmaziun professiunala (dapi l'onn 2008) ha la CSFP sviluppà l'Emna da la furmaziun professiunala.

Dapli preschientscha me

Cun amplifitgar l'occurrenza sin tschintg dis d'acziun ha la CSFP sperà da survegnir ina pli gronda preschientscha mediala – dond a las medias partenarias dapli temp per realisar contribuziuns e las emetter repetidamain en il decurs da l'emna. La finamira da la CSFP era da betg mo intimar ils partenaris tradiziunals – var 30 staziuns da radio localas – da rapportar davart l'eveniment, mabain era medias online e staziuns da televisiun localas.

L'idea ha funcziunà tenor plan. Bleras staziuns da radio han rapportà fin a tschintg dis da l'Emna da la furmaziun professiunala, han fatg dapli contribuziuns ed er emess quellas pliras giadas. Quai ha augmentà considerablamain il temp d'emissiun effectiv. Era portals online e singulas staziuns da televisiun localas han producì contribuziuns davart la furmaziun professiunala.

Ina gronda varietad tematica

Las differentas tematicas tractadas han cumpiglià reportaschas da manaschis d'emprendissadi, intervistas cun campiunessas e campiuns da professiuns, cussegliadras e cussegliaders da carriera fin a rundas da discussiun cun represchentantas e represchentants da l'economia e politica. Era cun cusseglier federal Guy Parmelin hai dà in'intervista ch'è vegnida messa a disposiziun a tut ils partenaris da medias.

In'evaluaziun detagliada da l'emprima Emna da la furmaziun professiunala manca anc. La Conferenza svizra dals uffizis per la furmaziun professiunala vegn ad analisar l'eveniment e consultar ils chantuns participads. Ma igl è gia ussa cler che l'Emna da la furmaziun professiunala vegn ad avair lieu era l'auter onn (13 fin 17 da matg 2024). La CSFP spera da pudair chattar en l'avegnir er organisaziuns dal mund professiunal che vulan realisar atgnas acziuns sut il tetg medial da l'Emna da la furmaziun professiunala.