Dals 5 fin ils 9 da matg 2025 ha lieu l’Emna naziunala da la furmaziun professsiunala. 23 chantuns sa participeschan, var 40 staziuns da radio ed ulteriuras medias discurran cun emprendist:as e campiun:essas da professiuns, discutan cun cussegliad:ras e furmatur:as professiunal:as, explitgeschan ils contexts e furneschan ils fatgs. Quest onn stattan en il focus ils suandants temas:

• tscherna da la professiun: Co chattan ils giuvenils la professiun adattada?
• promoziun da talents: Co daventa la furmaziun professiunala attractiva per giuvenils cun fitg bunas prestaziuns da scola?
• SwissSkills: Purtrets da campiun:essas da professiuns (campiunadis mundials, europeics, svizzers)

Mesemna, ils 7 da matg 2025 da las 10:30 fin las 11:15, ha lieu in stream da Lehrberufe Live! Var 20 emprendist:as s’annunzian en directa or da lur manaschi d’emprendissadi e raquintan da lur professiun e scolaziun. Il stream sa drizza en emprima lingia a las scolas superiuras cun scolar:as en la vegliadetgna da tscherner ina professiun (www.lehrberufe-live.ch).

En blers chantuns datti ultra da quai acziuns da manaschis d’emprendissadi, scolas professiunalas, federaziuns professiunalas ed uniuns da commerzi che organiseschan per geniturs e giuvenils sairas d’infurmaziun, dis da las portas avertas e plattafurmas da discussiun publicas.  

L'Emna da la furmaziun professiunala è in'iniziativa da la Conferenza svizra dals uffizis da la furmaziun professiunala e vegn sustegnida dal Secretariat da stadi per furmaziun, retschertga ed innovaziun. La gruppa en mira èn geniturs, giuvenils en la vegliadetgna da tscherner ina professiun e tut las persunas che s'engaschan per ina furmaziun professiunala ferma ed attractiva.